कानपुर आइआइटीका प्राध्यापकले पत्ता लगाए हड्डी पलाउने नयाँ प्रविधि
काठमाडौं– भारतको कानपुरस्थित इण्डियन इन्स्टिच्युट अफ टेक्नोलोजी आइआइटीका एकजना प्राध्यापकले क्षतिग्रस्त हड्डी फेरि पलाउने प्रविधिको विकास गरेका छन् ।
आइआइटीको बायोसाइन्स र बायोइन्जिनियरिङ विभागका प्राध्यापक अशोक कुमारले दुई रसायनको मिश्रणबाट नयाँ प्रविधिको विकास गरेको भारतबाट प्रकाशित हुने इण्डिया टुडे अनलाइनले जनाएको छ ।
दुई रसायनको पेस्टलाई शरीरको प्रभावित अंगमा लगाएको खण्डमा यसले हड्डी पलाउन सहयोग गर्ने जनाइएको छ ।
‘यसले प्राकृतिकजस्तै हड्डी बनाउँछ । भारतीय दृष्टिकोणबाट चिकित्साविज्ञानमा यसलाई क्रान्ति भन्न सकिन्छ ।’ प्राध्यापक कुमारलाई उद्धृत गर्दै इण्डिया टुडेले जनाएको छ ।
सेरामिकमा आधारित मिश्रणले बायोएक्टिभ मलिक्युल बाहकको रुपमा काम गर्ने र प्रयोग गरेको १५ मिनेटभित्र यस रसायन ठोस हुन्छ ।
यस रसायनले शरीरमा अक्सिजनको आपूर्ति र रक्तसञ्चारमा पनि कुनै असर नपार्ने जनाइएको छ ।
source:khabarhub
